Сёння ў Мінску падчас першага пасяджэння міжурадавай камісіі па эканамічным супрацоўніцтве падпісаны пратакол узаемадзеяння. У сталіцу з візітам прыбылі каля 60 прадстаўнікоў італьянскага бізнесу. Перспектыўнымі бакі завуць прамысловую кааперацыю, аўтамабіле- і машынабудаванне, навуку і тэхналогіі, а таксама міжрэгіянальныя сувязі. Вырашана ператварыць свабодную эканамічную зону "Брэст" у месца прыцягнення італьянскага капіталу.
Бенедэта дэла Ведава, статс-сакратар МЗС і міжнароднага супрацоўніцтва Італіі: "Мы прывіталі здыманне санкцый з Вашай краіны. Больш за тое, мы лічым, што далі штуршок гэтай падзеі. І зараз я ўпэўнены, што паміж Беларуссю і Італіяй, а таксама паміж Беларуссю і Еўрапейскім саюзам будзе ўзмацняцца супрацоўніцтва і ў палітычнай, і ў эканамічнай сферах. Упершыню ў Італіі мы назіраем эканамічны рост. Мы рады асвойваць нетрадыцыйныя для нас рынкі, такія як Беларусь, акрамя таго, гэта дадатковыя магчымасці для беларускіх экспарцёраў".
У гэтыя хвіліны перамовы бізнесменаў працягваюцца на беларуска-італьянскім бізнес-форуме і кантактна-кааперацыйнай біржы. Чакаецца падпісанне некалькіх кантрактаў. Так, італьянцы маюць намер наладзіць у Беларусі выраб сыроў мацарэла.