Намер – больш актыўна задзейнічаць патэнцыял супрацоўніцтва паміж краінамі сёння замацавалі ў Доме ўрада. У дакуменце, які падпісалі прэм'ер-міністры Беларусі і Славакіі, адлюстраваны падыходы да асноўных пытанняў міжнароднага і двухбаковага супрацоўніцтва. Бакі дамовіліся актывізаваць намаганні па падрыхтоўцы і рэалізацыі новых ініцыятыў і інвестпраектаў. Ключавым кірункам стане гандлёва-эканамічны блок - Беларусь і Славакія плануюць сумесна вырабляць высокатэхналагічную прадукцыю для рынкаў ЕС і ЕАЭС. Роберт Фіца запрасіў Андрэя Кабякова наведаць з візітам Славакію і адзначыў неабходнасць - у перспектыве - падпісаць паміж краінамі пагадненне аб навукова-тэхнічным супрацоўніцтве.
Андрэй Кабякоў, прэм'ер-міністр Беларусі: "Мы дамовіліся прадоўжыць сумесную работу па актывізацыі ўзаемнага гандлю таварамі і паслугамі, спрыяць рэалізацыі сумесных праектаў, напрыклад, па мадэрнізацыі прадпрыемстваў "Белшына", беларускіх прадпрыемстваў харчовай, фармацэўтычнай прамысловасці. Мы дамовіліся садзейнічаць стварэнню новых вытворчасцяў, арыентаваных на выпуск высокатэхналагічных відаў прадукцыі, для яе рэалізацыі на рынках Еўрапейскага саюза і ЕАЭС".
Роберт Фіца таксама прыняў удзел у цырымоніі адкрыцця новага офіса пасольства Славакіі. Адрас застаўся ранейшым (дыппрадстаўніцтва пераехала на іншы паверх), але амаль у два разы павялічыліся плошчы. Офіс гатовы прыняць большую колькасць грамадзян, у тым ліку тых, хто будзе звяртацца ў пасольства па шэнгенскую візу. Па меркаванні славацкага прэм'ера, цяперашні візіт і адкрыццё новага офіса стане далейшым крокам на шляху развіцця адносін Беларусі і Славакіі, а таксама адносін Беларусі і Еўрапейскага саюза.
