Эфектыўныя распрацоўкі нашых навукоўцаў, абмен тэхналогіямі і вопытам спрыяюць і ўмацаванню пазіцый у дыялогу з ключавымі партнёрамі. Вось, дарэчы, з адным з такіх партнёраў – Сербіяй, блізкай для нас краінай і надзейным саюзнікам - сёння была падпісана дарожная карта супрацоўніцтва. Першы перагаворны дзень афіцыйнага візіту сербскага прэм'ера Аляксандра Вучыча ў Мінск стаў вельмі прадукцыйным. Адбылася гутарка з беларускім калегам Андрэем Кабяковым у вузкім і пашыраным складах. Прайшла сустрэча і ў Палаце прадстаўнікоў. Падпісаны шэраг двухбаковых дакументаў. Акцэнт - на стварэнне сумесных прадпрыемстваў і кааперацыйных сувязяў. А таксама тавараабарот у паўмільярда долараў. Аб чым яшчэ дамовіліся бакі? Падрабязнасці ў Святланы Лук’янюк.
Сербскі флаг на беларускі Дом урада ўзнялі ўпершыню. Сённяшнія сустрэчы ў гэтых сценах адкрываюць новую старонку двухбаковых адносін. Мы прымаем з першым афіцыйным візітам прэм'ер-міністра Сербіі. Картэж высокага госця сустракае асабіста Андрэй Кабякоў.
Прымаюць высокага госця па ўсіх правілах дыпламатычнага пратакола - з чырвонай дарожкай, ротай ганаровай варты, ваенным аркестрам, пад гукі гімнаў дзвюх краін.
Пасля ўрачыстай сустрэчы прэм'еры адразу пераходзяць да справы. Першае абмеркаванне сумесных праектаў Мінска і Бялграда спачатку сам-насам.
Сустрэча ў вузкім складзе для журналістаў гэта толькі 2-хвілінныя пратакольныя відэаздымкі. Уся гутарка праходзіць за зачыненымі дзвярамі. Але галоўная тэма для абмеркавання зразумелая - гэта развіццё гандлёва-эканамічнага супрацоўніцтва. Тым больш што Сербія сярод краін, у якіх з Беларуссю дзейнічае рэжым свабоднага гандлю. Але пакуль гэтая перавага выкарыстоўваецца не на ўсе 100 %. Таму і гутарка сам-насам замест запланаваных 30 хвілін доўжылася каля гадзіны.
Абмеркаваўшы тэт-а-тэт вострыя пытанні, перамовы за вялікім сталом у пашыраным складзе прайшлі хутка. Да прэм'ераў падключыліся кіраўнікі міністэрстваў і ведамстваў. Яркай ілюстрацыяй працы на перспектыву стаў узаемны тавараабарот.
За 7 гадоў з 2009 па 2015 гады ён вырас у 5 разоў. Рэкордным стаў як раз 2015, калі ўзаемны гандаль налічыў больш за 250 мільёнаў долараў. Але такі вынік летась утрымаць не ўдалося. Ён упаў больш чым удвая. Прычым значна прасеў менавіта наш экспарт у Сербію. Мы прадаем на Балканы трактары, аўтобусы, бытавую тэхніку, А купляем агародніну, садавіну, фарбы і арматуру для мэблі.
Беларускі прэм'ер Андрэй Кабякоў дзеліцца сваім бачаннем павелічэння тавараабароту: выходзіць на прамыя пастаўкі тавараў, абыходзячы пасрэднікаў, называючы пры гэтым амбіцыйную, але рэальную лічбу ў 500 мільёнаў долараў.
У дзвюх краін ужо ёсць добры вопыт сумеснай працы. У Бялградзе збіраюць нашы трактары і аўтобусы. Сёння ўжо гутарка ідзе і аб стварэнні міжнароднага холдынгу па вытворчасці аўтакампанентаў.
Гэты праект чакае падтрымкі ўрадаў. Як і іншыя 50 мерапрыемстваў з падпісанай сёння дарожнай карты на найбліжэйшыя два гады. Так гаворка ідзе аб пасяджэннях міжурадавай камісіі па гандлёва-эканамічным супрацоўніцтве, арганізацыі дзелавых саветаў і ўзаемным прасоўванні тавараў.
Аляксандр Вучыч падчас заявы для прэсы адзначыў: яго краіна накіравала запрашэнні наведаць Белград і Прэзідэнту, і прэм'ер-міністру Беларусі. Тым самым дэманструючы гатоўнасць працягваць дыялог на самым высокім узроўні.
Важную ролю ва ўмацаванні адносін Мінска і Белграда адводзяць парламенцкай дыпламатыі. Сёння на сустрэчы ў Палаце прадстаўнікоў бакі сказалі "так" развіццю міжпарламенцкага дыялогу. Ён будзе спрыяць і больш актыўнаму эканамічнаму ўзаемадзеянню дзвюх краін.
На першае месца Мінск і Белград ставяць кааперацыю і інвестыцыі, як прыклад - праекты "Мінск-Мір" і комплекс "Маяк Мінска". Мы гатовыя пастаўляць свае электробусы, а таксама сучасныя пажарныя машыны. Іх сёння паказалі і высокаму госцю на пляцоўцы Мінскага аўтамабільнага завода. У першым квартале МАЗ паставіць у Сербію 36 адзінак такой тэхнікі. На працягу паўгода гэтую лічбу плануюць павялічыць да 50.
Абмяркоўваючы новыя праекты і сумеснае заўтра, Беларусь і Сербія памятаюць і агульную гісторыю. Другую сусветную вайну. Сёння Аляксандр Вучыч ушанаваў памяць загінуўшых беларусаў і ўсклаў вянок да манумента Перамогі ў Мінску.
Таксама высокі госць пабываў і ў музеі Вялікай Айчыннай вайны. Убачыў, як захоўваецца гісторыя для сённяшняга і будучых пакаленняў. А таксама пакінуў запіс у кнізе ганаровых гасцей.
