Беларусь і Пакістан плануюць стварыць сумесныя прадпрыемствы ў галіне машынабудавання, нафтахіміі і дрэваапрацоўкі - гэтыя і іншыя варыянты ўзаемадзеяння абмяркоўвалі сёння на пасяджэнні беларуска-пакістанскай міжурадавай камісіі па гандлёва-эканамічным супрацоўніцтве.
На працягу апошніх васьмі гадоў аб'ём гандлю паміж краінамі вагаўся ад 50 да 120 млн. долараў за год. Паміж тым, у нарошчванні двухбаковага эканамічнага супрацоўніцтва назіраюцца значныя перспектывы. І першым чынам за кошт экспарту беларускай прадукцыі па шырокім спектры найменняў. Сёння агучылі і жаданую лічбу тавараабароту - гэта 1 млрд. долараў.
Аляксей Багданаў, начальнік галоўнага ўпраўлення Міністэрства сельскай гаспадаркі і харчавання Беларусі: "На сённяшні дзень у нас вельмі добрая дынаміка паставак нашай прадукцыі ў Пакістан. У якасці прыкладу магу прывесці лічбу - на 435 мільёнаў долараў мы паставілі прадукцыі за паўгоддзе. У аснове сваёй гэта дзіцячае харчаванне. І гэта ў два з паловай разы больш, чым у 2014 годзе. Таксама заключаны кантракт на 10 мільёнаў долараў на пастаўкі сухога малака ў Пакістан, ён знаходзіцца на рэалізацыі ў гэты момант".
Гэтымі днямі ў Беларусі знаходзіцца прадстаўнічая дэлегацыя Пакістана. Гэта міністры і бізнесмены, а ўжо ў панядзелак у Мінск з трохдзённым візітам прыбудзе прэм'ер-міністр Пакістана. Чакаецца, што Наваз Шарыф правядзе шэраг афіцыйных сустрэч і пабывае на машынабудаўнічых прадпрыемствах. Таксама пройдуць перамовы з Прэзідэнтам Беларусі. У дні візіту ў Мінску адкрыецца і бізнес-форум. Удзел у ім пацвердзілі каля 20 пакістанскіх кампаній.
