З Пензенскай вобласцю мы гатовыя падзяліцца перадавымі тэхналогіямі. Наконт гэтага ішла размова сёння пачас сустрэчы Прэзідэнта з губернатарам расійскага рэгіёна. Гэта першы візіт Івана Белазерцава ў Беларусь у якасці губернатара, аднак нашу краіну ён ужо наведваў у складзе дэлегацыі чатыры гады таму. Менавіта таму размова са старту на сяброўскай ноце. Аляксандр Лукашэнка адзначае: Пензенская вобласць - даўні і надзейны партнёр Беларусі. Летась удалося пераламіць тэндэнцыю зніжэння тавараабароту - ён перавысіў 50 мільёнаў долараў. А сёлета за чатыры месяцы лічба вырасла і зусім у паўтара раза ў параўнанні з такім жа перыядам мінулага года. І ўсё ж можам больш. Лакаматыў развіцця - прамысловая сфера. У рэгіёне развіта дылерская сетка брэндаў МТЗ, "Амкадор", “Аршанскі інструментальны завод”, "Гомсельмаш". Аднак гэта не ўвесь патэнцыял адносін.
Іван Белазерцаў, губернатар Пензенскай вобласці Расіі: "Мы можам стварыць новыя напрамкі супрацоўніцтва, значна павялічыць аб'ём тавараабароту, узмацніць кааперацыю паміж прамысловымі прадпрыемствамі, у нас такая магчымасць ёсць. Я лічу, што ў нас добрыя перспектывы ўзаемадзеяння ў сферы машынабудавання і электронных сістэм, і пасля мінулай сустрэчы нам спадабаўся IT-парк Беларусі. І нашы пензенскія калегі практычна год узаемадзейнічаюць з вамі, ёсць кааперацыя".
Пачаўся візіт расійскіх гасцей з гістарычнай памяці - ускладання кветак да манумента Перамогі. У складзе дэлегацыі прамыслоўцы, буйныя бізнесмены і дэпутаты. Плануецца, што госці правядуць у нашай краіне шэраг сустрэч і заўтра наведаюць выставу "Белагра".
