Аршанскі рэгіён сёння стаў цэнтрам транзіту тавараў і грузаў паміж Еўропай і Азіяй. Аўтамабільны тэрмінал мультымадальнага прамыслова-лагістычнага комплексу адкрыўся ў Балбасаве. Аб'екты першай чаргі размешчаныя на тэрыторыі 10 гектараў. Тут узвялі складскія памяшканні, адміністрацыйна-бытавы комплекс, абсталявалі стаянкі для грузавых і легкавых машын. У перспектыве ў пасёлку створаць авія- і чыгуначны тэрміналы. Па сутнасці комплекс стане магутным прамыслова-лагістычным цэнтрам з усёй неабходнай інфраструктурай і дазволіць задзейнічаць увесь лагістычны патэнцыял Оршы. Нагадаем, Балбасава разам з Оршай і Баранью ўваходзіць у так званы аршанскі трохвугольнік. Кіраўнік дзяржавы паставіў задачу зрабіць яго развітым прамысловым цэнтрам, стварыць усе ўмовы для камфортнага жыцця.
Як праект паўплывае на будучыню рэгіёна, ведае Марына Раманоўская.
Дваццаць чатыры гадзіны на суткі і без выхадных. Аўтамабільны лагістычны тэрмінал гатовы да прадукцыйнай працы. Цяжка ўявіць, што калісьці на месцы сучасных карпусоў было чыстае поле. Зараз тут размясціліся складскія памяшканні, адміністрацыйны будынак, стаянкі для легкавых і грузавых аўтамабіляў. Комплекс стане часткай міжнароднай лагістычнай сістэмы.
Пагранічны, мытны, ветэрынарны кантроль, страхавыя паслугі. Усе неабходныя для перамяшчэння грузаў аперацыі зараз будуць даступныя на адной пляцоўцы ў пасёлку Балбасава. Дарэчы, гэта не першы інвестпраект лагістычнага аператара, падобны комплекс функцыянуе на беларуска-польскай мяжы. Сёлета запрацуе яшчэ адзін тэрмінал у Бераставіцы. Сучасны цэнтр размяшчаецца на скрыжаванні двух буйных аўтамагістраляў - М1 і М8. Комплекс аб'яднае вытворчыя прадпрыемствы, гасцініцу, гандлёвыя цэнтры, страхавыя кампаніі, банкі. Буйная лагістычная пляцоўка ўдыхне новае жыццё ў пасёлак. У перспектыве ў лагістычным цэнтры плануюць стварыць каля 2 тысяч рабочых месцаў. Летась у ліпені прамысловую пляцоўку ў Балбасаве наведаў Кіраўнік дзяржавы. Адно з асноўных даручэнняў Прэзідэнта тады датычылася тэмпаў будаўніцтва. Іх трэба паскараць, бо гэта вялізная перспектыва - магчымасць развівацца і зарабляць, што вельмі актуальна для 3-тысячнага пасёлка.
Аляксандр Ціханскі на новым аб'екце адразу знайшоў працу - уладкаваўся старшым кладаўшчыком. Гаворыць: адкрыццё такога буйнога комплексу - доўгачаканая падзея для жыхароў усяго раёна. Паралельна ідзе мадэрнізацыя ўзлётна-пасадачнай паласы, якая знаходзіцца побач. Для пераразмеркавання грузавых патокаў на поўную сілу плануюць задзейнічаць не толькі аэрадром, але і чыгунку, бо Орша з'яўляецца найбуйнейшым чыгуначным вузлом краіны. Зараз тут рыхтуюць да адпраўкі ў Кітай кантэйнеры з беларускімі таварамі. Па маршруце Орша - Наньчан першы экспартны цягнік адправіцца ўжо 11 лютага. Тавар даставяць за 10 дзён - у чатыры разы хутчэй, чым марскім шляхам.
У перспектыве кантэйнерныя грузы з Оршы ў Кітай плануюць адпраўляць кожны месяц. Такім чынам, не толькі рэгіён, але і краіна ў цэлым стане яшчэ бліжэй да вялізнага рынку Паднябеснай.
