Праект беларускай атамнай станцыі прадстаўлены сёння ў рамках міжнароднай выставы "Атамэкспа", якая адкрылася ў Маскве. Галоўная тэма гэтага форуму - атамная энергетыка - імпульс сацыяльна-эканамічнага развіцця. Максім Кароткін даведаўся, як мірны атам можа змяняць глабальную эканоміку.
40 краін і больш за тысячу ўдзельнікаў. Сёмы раз "Атамэкспа" пацвярджае рэпутацыю найбуйнейшай выставы тэхналогій, звязаных з атамнай энергетыкай. Зрэшты, стэнды і дэманстрацыйныя румы - гэта толькі знешні антураж сур'ёзнага тэарэтычнага форуму. Сёння тут гавораць не проста аб мірным атаме, але і аб тым, як галіна змяняе свет.
Тэмай форуму сёлета стала атамная энергетыка як імпульс сацыяльна-эканамічнага развіцця. Цвет сусветнай атамнай індустрыі абмяркуе ўплыў галіны як на эканоміку асобных краін, так і на глабальныя эканамічныя працэсы.
Першая тэндэнцыя, агучаная на форуме, датычыцца аднаўлення сусветнага рынку атамнай энергіі. Пасля аварыі на Фукусіме галіна не проста аднавілася, але і пачынае хутка набліжацца да так званага "дафукусімаўскага" ўзроўню. Такім чынам, аб крызісе даверу да мірнага атама размова ўжо не ідзе. Больш за тое, аналіз сусветнай атамнай індустрыі дае разуменне, што гэтая галіна становіцца адной з дамінант не проста эканомікі, але і глабальнага развіцця. Паколькі сёння краіны - заказчыкі АЭС разлічваюць атрымаць штосьці большае, чым проста энергія.
Сёлета на "Атамэкспа" размясціўся і стэнд беларускай атамнай станцыі. У айчынных атамшчыкаў на гэтыя дні запланаваны цэлы шэраг перамоў - дырэкцыя глядзіць ужо ў этап абсталявання станцыі. БелАЭС - адна з паўтара дзясяткаў, якія ўзводзяцца ў свеце прама зараз і, адпаведна, варта чакаць яе параўнання з замежнымі аналагамі.
Дзве галоўныя тэндэнцыі апошніх гадоў - вектар развіцця атамнай энергетыкі накіроўваецца на Усход і сур'ёзнае амаладжэнне кадраў, якія працуюць у ядзернай сферы. Галіна становіцца ўсё больш прывабнай для маладых спецыялістаў і гэтаму ёсць лагічнае тлумачэнне: атамныя тэхналогіі імкліва ўдасканальваюцца і за імі трэба паспяваць. Аднак аналітыкі фіксуюць і яшчэ адну асаблівасць: тэмпы росту сусветнай атамнай энергетыкі пакуль не паспяваюць за глабальнымі зменамі клімату. Значыць, і ў найбліжэйшай будучыні варта чакаць росту значнасці мірнага атама.
