Аграрыі прымаюць меры, каб мінімізаваць страты з-за анамальна гарачага надвор'я

12 Чэрвеня 2019

Самыя гарачыя навіны гэтых летніх дзён падносіць надвор'е. У Беларусі анамальная спякота, і ледзь не штодня абнаўляюцца тэмпературныя рэкорды. Напярэдадні ў Мінску была пабіта адзнака 82-гадовай даўнасці. Тэмпература паднялася вышэй за 32 градусы.

У краіне аб'яўлены аранжавы ўзровень небяспекі, а сіноптыкі прагназуюць: анамалія захаваецца і ў найбліжэйшыя дні. Капрызы прыроды хоць і з плюсам, але пякучае сонца дастаўляе нямала клопатаў са знакам мінус. Пакутуюць людзі - медыкі не рэкамендуюць выходзіць на вуліцу ў самыя гарачыя гадзіны, плавіцца асфальт - яго паліваюць вадой, але горш за ўсё такое гарачае сонца ўплывае на пасевы. Адсутнасць дажджоў, сухія паветра і глеба літаральна выпальваюць працу аграрыяў. Рэагаваць і прымаць меры трэба прама зараз, важна захаваць, а дзе трэба і папоўніць пасевы, каб восенню быць з хлебам, бо мінулы год выдаўся неўрадлівым. І рэзервы, якія былі назапашаны раней, амаль скончыліся.

На гэта напярэдадні наш Прэзідэнт звярнуў асаблівую ўвагу, калі прызначаў кіраўнікоў мясцовай вертыкалі. Сёння сітуацыю ў сельскай гаспадарцы Кіраўнік дзяржавы дэталёва абмеркаваў з профільным міністрам і віцэ-прэм'ерам. Найбольш складана справы ідуць у цэнтральнай частцы Беларусі. Спецыялісты абследуюць пасевы, прымаюць меры, каб мінімізаваць страты. Важна нарыхтаваць і неабходную колькасць кармоў, і тут асаблівая стаўка на кукурузу.

Калі чакаць дажджоў, як ідуць справы ў палях і якія прагнозы ад аграспецыялістаў? Усе меркаванні ў рэпартажы Аляксея Волкава. 11 чэрвеня на досвітку ўпаў рэкорд, які пратрымаўся 82 гады. У сталіцы сіноптыкі зафіксавалі 32,2 градуса. Сёння лічбы паўтарыліся. У сталіцы ледзь не кіпіць асфальт - плюс 50 па Цэльсіі, можна прама на дарозе смажыць яечню. І калі гарачае сонца вялікіх гарадоў хоць трохі перабіваецца кандыцыянерам і бутэлькай халоднай вады, то словазлучэнне "летні дождж" падобнае на мантру для фермераў і гаспадарак. Бескампрамісная і анамальная спякота прыводзіць да таго, што на палях гіне немалая колькасць пасеваў. Напрыклад, агракамбінат "Ждановічы". Традыцыйна моцны сельскагаспадарчы кластар імкнецца знізіць градус напалу на палях за кошт разумнай работы з пасевамі. Прычым падрыхтоўваюць культуры яшчэ ўвосень - навучаныя вопытам. Уносяць у глебу неабходныя ўгнаенні як арганічныя, так і фосфарна-азотна-калійныя. Аб'ёмы вылічваюцца тысячамі тон. Так культуры становяцца больш моцнымі і менш успрымальнымі да перападаў надвор'я. Аднак пры анамальнай спякоце будучаму ўраджаю ўсё роўна неабходная дапамога.

У прагнозах Белгідрамета няма аптымізму - да канца тыдня аранжавы ўзровень небяспекі. Дамовіцца з нябеснай канцылярыяй - справа першапачаткова немагчымая, а значыць неабходна зрабіць усё самім, каб выйсці з ва ўсіх сэнсах гарачых дзён з мінімальнымі стратамі. Тым больш што беларускім аграрыям не ўпершыню ратаваць ураджай насуперак свавольнаму надвор'ю.

На сітуацыю аператыўна рэагуе і Кіраўнік дзяржавы і трымае яе на асабістым кантролі. Сёння Прэзідэнт заслухаў даклады міністра сельскай гаспадаркі і профільнага віцэ-прэм'ера. Збожжавыя культуры - важны стратэгічны рэсурс, і змагацца за кожны каласок у полі не звышзадача, а абавязак спецыялістаў. Каб плюс надвор’я не ствараў у кашальках аграрыяў мінус, патрэбная дакладная стратэгія, пра якую гаварыў напярэдадні і Аляксандр Лукашэнка. Своечасова дасяваць культуры, не даць зямлі пуставаць - зразумелыя, але эфектыўныя інструменты, каб засуха не прымусіла восенню цэны на хлеб закіпаць.

Тым больш што ёсць станоўчы прыклад, калі кліматычныя анамаліі развярнулі пад сябе - вінаград, бахчавыя і іншая садавіна прыжыліся. Галоўнае - не кідаць сваіх жа фермераў.

Ёй прысвячалі песні, здымалі мульфільмы, а крыху пазней яна стала сімвалам эпохі хрушчоўскіх эксперыментаў. І хаця ў савецкія гады кукуруза так і не стала культурай нумар адзін, яна важная рэсурсавая адзінка ў беларускай аграрнай кнізе. У нас царыца палёў не толькі асвоілася, але і змагла выдужаць супраць распаленага сонца. Зрэшты, на поўдні сітуацыя больш складаная.

У гэты час расліна павінна быць ужо ў палову чалавечага росту. На справе толькі 10 сантыметраў. Сцеблы і карані згарэлі пад пякучым сонцам. Ураджай з гэтага поля прыйдзецца спісаць. У сельгаспрадпрыемстве "Урыцкае" ў Гомельскім раёне такіх палёў каля 50 гектараў. І з кожнай хвілінай страты дадаюцца. Дажджоў не было больш як месяц.

Кукуруза - вельмі патрабавальная да глебы, класа земляробства расліна. Але ад гэтага яшчэ больш карысная ў гаспадарцы. Прапанова Прэзідэнта такая: не сушыць царыцу палёў (гэта дорага), а захоўваць у палімерных рукавах - эканомія на траціну. У дадатак адпраўляць на жывёлагадоўчыя фермы, дзе ёсць вялізны попыт.

Пажоўклыя пасевы, загубленыя расліны ад анамальнай спякоты. Беларусь з падобным сутыкалася і летась. Сітуацыя з ураджайнасцю ў асобных рэгіёнах і сапраўды не для дошкі гонару. Сонечны ўдар па сельскай гаспадарцы ўзору 2018 года прымусіў выкарыстаць многія зернефуражныя рэзервы. Праблему лягчэй папярэдзіць, чым вырашаць постфактум. Аднаўленне запасаў, нарыхтоўка культур на перспектыву - патрабаванне Прэзідэнта і ключавая задача для Мінсельгасхарча.

Па ацэнках аграрыяў, бяды не будзе. Для гэтага мабілізаваныя лепшыя розумы і сілы. Справаздачны час - прыкладна сем дзён. Ужо на наступным тыдні аграрыі падрыхтуюць даклад і напэўна дарожную карту вырашэння ўсіх гарачых пытанняў.