20 мільёнаў долараў атрымае адзін з беларускіх банкаў у рамках пагаднення аб сіндыціраваным крэдыце з Еўрапейскім банкам рэканструкцыі і развіцця. Дакумент падпісаны сёння ў Мінску. Гэта крэдытная лінія з працяглым тэрмінам пагашэння - да 4 гадоў. Грошы пойдуць на развіццё малога і сярэдняга бізнесу, прадпрыемствы змогуць узяць крэдыты для развіцця сваёй справы. Гэта здзелка складаецца з дзвюх частак: 5 мільёнаў дасць сам Еўрапейскі банк рэканструкцыі і развіцця, а 15 дадуць у доўг 4 еўрапейскія фінансавыя інстытуты. Некаторыя з іх упершыню выходзяць на беларускі рынак.
Еўрапейскі банк рэканструкцыі і развіцця гэтай восенню разлічвае зацвердзіць і краінавую стратэгію для Беларусі. Ужо падрыхтавана некалькі варыянтаў праекта, яны ў стадыі абмеркавання. Чакаецца, што канчатковае рашэнне будзе прынята ў кастрычніку.
