Беларусь зацікаўленая ў канструктыўным дыялогу з міжнароднай бізнес-супольнасцю. Пра гэта сёння заявіў прэм'ер-міністр на сустрэчы з актывам Міжнароднага кангрэса прамыслоўцаў і прадпрымальнікаў. Паводле слоў Андрэя Кабякова, у краіне забяспечваецца макраэканамічная збалансаванасць, устойлівасць на фінансавым і валютным рынках. Паляпшаюцца і агульныя фінансавыя паказчыкі працы эканомікі. У цесным узаемадзеянні з прадпрымальнікамі падрыхтаваны небывалы пакет дакументаў для ўдасканалення ўмоў вядзення бізнесу і ўцягвання насельніцтва ў актыўную эканамічную дзейнасць.
Андрэй Кабякоў, Прэм'ер-міністр Беларусі: "Беларусь вельмі зацікаўленая ў супрацоўніцтве з міжнароднымі карпарацыямі. Ва ўмовах жорсткай барацьбы за інвестыцыі і тэхналогіі Беларусь бесперапынна працуе над паляпшэннем інвестыцыйнага клімату і ўмоў для стварэння і функцыянавання вытворчасці. У нас дзейнічае прасунутае інвестыцыйнае заканадаўства з рознымі прэферэнцыямі. Гэта стварае эканамічныя перадумовы для прыцягнення інвестараў і размяшчэння свайго бізнесу, асабліва ў малых і сярэдніх гарадах і сельскай мясцовасці, у свабодных эканамічных зонах, парку "Вялікі камень", Парку высокіх тэхналогій".
На думку прэм'ера, 11-я асамблея Міжнароднага кангрэса прамыслоўцаў і прадпрымальнікаў, якая адкрылася сёння ў Мінску, надасць імпульс развіццю эканамічных адносін і максімальнаму скарачэнню адміністрацыйных бар'ераў для супрацоўніцтва. У маштабным форуме прымаюць удзел дзелавыя саюзы з больш як 20 краін.
