Слуханні па рэзананснай крымінальнай справе пачаліся сёння ў Мінску. Заўтра абласны суд працягне разгляд усіх акалічнасцяў гібелі салдата тэрміновай службы Аляксандра Коржыча.
Суддзя прыняў рашэнне пачаць з допыту абвінавачаных. Затым дапытаюць пацярпелых і сведак. Сёння ў судзе Маскоўскага раёна сталіцы, дзе праходзіць пасяджэнне, пракурор тры з паловай гадзіны зачытваў абвінавачанне. Юрый Шарснёў пералічыў усе эпізоды атрымання хабараў і перавышэння службовых паўнамоцтваў абвінавачанымі.
На лаве падсудных трое вайскоўцаў навучальнага цэнтра ў Пячах: Яўген Бараноўскі, Ягор Скуратовіч і Антон Важэвіч.
Яны абвінавачваюцца адразу па трох артыкулах Крымінальнага кодэкса: "Перавышэнне ўлады, што пацягнула цяжкія наступствы - давядзенне да самазабойства”, "Атрыманне хабару" і "Крадзеж". На працэсе прысутнічаюць мама і бабуля загінуўшага салдата. Таксама сёння ў суд з'явіліся 22 вайскоўцы, але гэта няпоўная колькасць пацярпелых. Астатнія будуць выкліканыя на працэс пазней. Абвінавачаным па справе пагражае да 12 гадоў пазбаўлення волі.
