Следчы камітэт разбіраецца ў акалічнасцях здарэння ў Гомелі, дзе невядомыя кінулі ў будынак інспекцыі па падатках і зборах кактэйль Молатава. На дадзены момант узбуджана крымінальная справа па артыкуле "Наўмыснае пашкоджанне маёмасці, учыненае агульнанебяспечным спосабам". Разбітае акно падатковай інспекцыі выявілі каля 8 раніцы, па вонкавых прыметах было бачна, што пашкоджана яно запальнай сумессю. На месца здарэння выехала следча-аператыўная група.
Сяргей Кабаковіч, начальнік аддзела Следчага камітэта Беларусі: "Падчас агляду на месцы здарэння следчымі выяўлены і канфіскаваны рэшткі бутэлечнага шкла, а таксама тканіна з пахам гаруча-змазачных матэрыялаў. Па дадзенай справе прызначаны экспертныя даследаванні, у тым ліку пажаратэхнічная экспертыза і экспертыза па рэштках гаруча-змазачных матэрыялаў. Праводзіцца комплекс следчых дзеянняў і аператыўна-вышуковых мерапрыемстваў па ўсталяванні ўсіх акалічнасцяў здарэння, а таксама асобы, што, магчыма, мае дачыненне да пашкоджання маёмасці".
Побач з інспекцыяй размешчаны прыватны сектар і гаражны кааператыў. Але мясцовыя жыхары сцвярджаюць, што не чулі і не бачылі, як і калі ўсё адбылося. Мяркуюць, што ноччу. Згодна з артыкулам, па якім узбуджана крымінальная справа, парушальнікам пагражае да 10 гадоў пазбаўлення волі.
