Некалькі гадзін таму ў Мінску абвясцілі прысуд па справе аб гібелі радавога Аляксандра Коржыча. Суд задаволіў патрабаванні дзяржабвінаваўцы. Тры сяржанты, якіх абвінавачваюць у давядзенні вайскоўца да самагубства, прызнаныя вінаватымі. Нагадаем, трагедыя ў Пячах здарылася летась у кастрычніку. Радавы Аляксандр Коржыч быў знойдзены павешаным. На вынясенні прысуду прысутнічалі некалькі дзясяткаў вайскоўцаў.
Адзначым, абвінавачваныя былі прызнаныя вінаватымі па ўсіх пунктах прад'яўленага абвінавачання. У сваю чаргу маці загінуўшага салдата засталася нездаволена вердыктам суда і збіраецца абскардзіць прыгавор. Таксама суд вынес прыватнае азначэнне ў адрас Міністэрства абароны з мэтай недапушчэння такіх інцыдэнтаў у будучыні. З залы суда рэпартаж Юрыя Шаўчука.
Нягледзячы на тое што пасяджэнне Мінскага абласнога суда праходзіла ў выязным рэжыме ў самай вялікай зале судовых пасяджэнняў - у будынку суда Маскоўскага раёна, прысутныя тут змясціліся з цяжкасцю. На абвяшчэнне прысуду прыйшлі дзясяткі журналістаў і яшчэ больш салдат. У першых шэрагах маці загінуўшага салдата. Напярэдадні, выступаючы ў спрэчках дзве гадзіны, пракурор Юрый Шарснёў папрасіў прызнаць сяржантаў вінаватымі і прыгаварыць да тэрмінаў пазбаўлення волі ад 6 да 9 гадоў.
Юрый Шарснёў, дзяржаўны абвінаваўца: "Злачыннымі дзеяннямі прычынены істотны ўрон правам і законным інтарэсам вайскоўцаў, істотны ўрон воінскай дысцыпліне. Прычынены ўрон інтарэсам дзяржавы ў выглядзе падрыву аўтарытэту воінскай дысцыпліны".
Нагадаем, цела Аляксандра Коржыча было знойдзена летась 3 кастрычніка ў будынку на тэрыторыі воінскай часці ў Барысаўскім раёне. Як высветлілася пазней, у падвале медыцынскай роты мёртвы салдат знаходзіўся тыдзень. З поля зроку вайсковец быў страчаны пасля таго, як вярнуўся з медсанчасці. Сяржанты абвінавачваліся па трох артыкулах Крымінальнага кодэкса: "Перавышэнне ўлады, што выклікала цяжкія наступствы - давядзенне да самагубства", "Атрыманне хабару" і "Крадзеж".
Сваю віну ўсе трое прызналі, але толькі часткова. Падчас апошняга слова Бараноўскі прызнаў сваю віну, але адмаўляў, што мае дачыненне да давядзення да самагубства Коржыча. Такімі ж практычна былі словы і Скуратовіча. У той жа час Антон Вяжэвіч сказаў, што віну прызнае і шчыра каецца, прыносіць выбачэнні ўсім пацярпелым і асабліва Святлане Коржыч - маці Аляксандра.
Расследаванне гібелі 21-гадовага салдата доўжылася паўгода. За дзень на допыт выклікаліся па 20-30 вайскоўцаў. Усяго было апытана каля 800 чалавек. Суд па гэтай крымінальнай справе пачаўся 8 жніўня. І вось праз тры месяцы Феміда вынесла свой вердыкт.
Юрый Шарснёў, дзяржаўны абвінаваўца: "Згодна з прысудам, Бараноўскаму прызначана пакаранне ў выглядзе пазбаўлення волі тэрмінам 9 гадоў, Вяжэвічу - 7 гадоў, Скуратовічу - 6 гадоў".
Усе фігуранты будуць адбываць пакаранне ў калоніі ва ўмовах узмоцненага рэжыму. Адзначу, што суд поўнасцю пагадзіўся з пазіцыяй дзяржабвінавачання. Да ўсіх траіх абвінавачваных прыменена канфіскацыя маёмасці, яны таксама пазбаўлены сяржанцкага звання.
Акрамя трох сяржантаў, якія сёння пачулі прысуд, да крымінальнай адказнасці былі прыцягнуты яшчэ 12 фігурантаў. Але іх дачыненне да смерці вайскоўца не было вызначана, таму гэтыя справы выдзелены ў асобную вытворчасць. Усяго за 6 месяцаў за ўчыненне воінскіх злачынстваў па крымінальных справах аб нестатутных адносінах асуджана 28 вайскоўцаў. Дадам, што пакуль прыгавор суда па справе Коржыча ў законную сілу не ўступіў. На тое, каб абскардзіць яго, у бакоў будзе 10 сутак.
