Былы ўладальнік Мотавела прысуджаны да 11 гадоў пазбаўлення волі з канфіскацыяй маёмасці. Суд Фрунзенскага раёна сталіцы сёння аб’явіў вердыкт у дачыненні да Аляксандра Мураўёва. Бізнесмен прызнаны вінаватым у махлярстве, крадзяжы і ўхіленні ад выплаты падаткаў. Вінаватымі таксама прызнаныя і астатнія фігуранты гучна й справы. Як склаўся лёс некалі буйнога інвестара і самога прадпрыемства, раскажа Уладзімір Каралёў.
Сотні старонак матэрыялаў крымінальнай справы, некалькі месяцаў следства і прысуд Феміды. Былы ўладальнік Мотавела, старшыня наглядальнага савета шклозавода "Ялізава", бізнесмен Аляксандр Мураўёў прысуджаны да 11 гадоў пазбаўлення волі ў калоніі ўзмоцненага рэжыму. Акцыі Мотавела, па рашэнні суда, вяртаюцца дзяржаве. У даход таксама звернутая кватэра, тры аўтамабілі і два матацыклы. Ужо вядома, што бок абвінавачання будзе аспрэчваць рашэнне Феміды.
Аляксандр Мураўёў прызнаны вінаватым у махлярстве, крадзяжы і ўхіленні ад выплаты падаткаў. Баку абвінавачання ўдалося даказаць, што гандаль пры дапамозе пасрэднікаў дазваляў Мотавела недаплачваць падаткі ў казну. Але самае цяжкае абвінавачанне - у незаконным завалоданні акцыямі. У 2007-м актывы Мотавела ў дзяржавы купіла аўстрыйская кампанія "АТЭК Холдынг", падкантрольная Мураўёву. Інвестар узяў на сябе абавязацельствы, якія не выканаў.
Крысціна Асран, старшы памочнік пракурора Фрунзенскага раёна г. Мінска: "Невыкананне ўмоў дамовы куплі-продажу акцый, па якой акцыі Мотавела прадаваліся па намінальнай цане, якая ў 7,5 раза ніжэйшая за рыначную цану. У сваю чаргу пакупнік - аўстрыйская кампанія - абавязаны быў выканаць шэраг умоў дамовы, адной з такіх умоў з'яўлялася інвесціраванне ў таварыства сумы не меней за $20 млн".
Бок абвінавачання настойвае, што за пяць гадоў сума на $20 млн долараў сапраўды была залічаная на рахункі Мотавела, але праз некалькі дзён заўсёды пераводзілася на іншыя падкантрольныя бізнесмену фірмы.
У 2012 годзе пакупнікам, інвестару падаецца пра нібы поўнае выкананне дамовы куплі-продажу. Менавіта гэтая падробленая справаздача дазволіла падманным шляхам завалодаць акцыямі ААТ "Мотавела". Адметна і тое, што на працягу месяца пасля разблакіроўкі акцый яны прадаюцца ад адной кампаніі іншай аўстрыйскай кампаніі.
Як растлумачыла суддзя, шкода прадпрыемству стала магчымай праз адсутнасць належнага кантролю з боку Мінпрама і Дзяржкаммаёмасці. Суд накіруе ведамствам прыватнае азначэнне, на якое трэба будзе даць адказ на працягу месяца.
Таксама вінаватымі прызнаныя і астатнія фігуранты. Былы дырэктар прадпрыемства Казімір Мароз за службовую халатнасць і крадзеж прысуджаны да 5 гадоў абмежавання волі з канфіскацыяй маёмасці. І яго намеснік Таццяна Лукавец прызнала сваю віну ў службовай падробцы і была вызваленая ад пакарання з-за заканчэння тэрміну даўнасці.
