Сёння сталічная міліцыя пракаменціравала сітуацыю вакол затрымання расійскага псіхолага Міхаіла Казлова ў Мінску. У дачыненні да мужчыны праводзіцца праверка, гаворыцца ў афіцыйным паведамленні ГУУС на сайце ведамства. Учора вечарам у міліцыю патэлефанавала жанчына і паведаміла, што на трэнінгу яе абразілі, зняважылі гонар і годнасць, махлярствам завалодалі яе 250-ю доларамі. Адрэагавалі на званок супрацоўнікі падраздзяленняў наркакантролю і патрульна-паставой службы міліцыі Кастрычніцкага раёна. Удзельнікаў трэнінгу адвезлі ў РУУС для разбору, пасля апытання адпусцілі. Казлова пакінулі для тлумачэнняў заявы.
Міхаіл Казлоў - расійскі псіхолаг, вядучы трэнінгаў асабістага росту і некалькіх рэаліці-шоу. Стаў вядомы масаваму гледачу пасля ўдзелу ў тэлепраекце "Дом-2". Казлоў неаднаразова быў у Мінску з трэнінгамі "Абуджэнне" і "Proвакацыя росту". На сайтах з водзывамі аб курсах некаторыя скардзіліся на жорсткасць методык і адгаворвалі патэнцыйных кліентаў прыходзіць на заняткі, каб "не пакалечыць сабе псіхіку". Вядома, што напярэдадні ў трэнінгу ўдзельнічалі 33 чалавекі. Мы маем інфармацыю, што ўжо ў гэтыя хвіліны расійскі псіхолаг павінен пакідаць сцены Кастрычніцкага РУУС.
