Зараз жанчына знаходзіцца ў рэанімацыі - яе жыццю нічога не пагражае. З ёй працуюць псіхолагі. Аб гэтым нашаму агенцтву паведамілі сёння ў 10-ай гарадской клінічнай бальніцы. На месцы здарэння ўсю ноч працавалі міліцыя, следчыя, эксперты-крыміналісты. Нагадаем, напярэдадні каля 17:30 17-гадовы хлопец зайшоў у гандлёвы цэнтр з чахлом ад гітары, у якім знаходзіліся сякера і бензапіла. Уключыўшы яе, ён напаў на адну з наведвальніц. Жанчына загінула. Пасля з сякерай накінуўся на другую дзяўчыну, ёй удалося выратавацца. Злачынца за лічаныя хвіліны затрымалі.
Узбуджана крымінальная справа. У распараджэнні следства знаходзяцца відэазапісы з камер назірання, таму дакладна вядома - злачынца быў адзін. Усе чуткі аб тым, што іх было некалькі, звязаныя з тым, што чалавека бачылі спачатку з бензапілой, потым з сякерай, растлумачылі ў Следчым камітэце.
