Летась у Мінскай вобласці на пажарах удалося выратаваць 12 чалавек дзякуючы сігналу пажарнага апавяшчальніка. І ўжо сёлета таксама ўдалося пазбегнуць некалькіх трагедый.
Так, у Заслаўі прылада папярэдзіла сям'ю Андрэевых - гаспадары з дачкой паспелі выбегчы з палаючага дома. На месца аператыўна прыбыли ратавальнікі і ліквідавалі ўзгаранне. Прычынай пажару магло стаць замыканне электраправодкі. Больш падрабязна Наталля Кузьміцкая.
Усё здарылася літаральна за некалькі хвілін. Апоўначы ў адным з пакояў дома сям’і Андрэевых успыхнула полымя. Дзмітрыю прыйшлося імгненна вывесці жонку разам з трохгадовай дачкой. На шчасце, старэйшыя сыны былі ў бабулі.
Скончылася гэта гісторыя нетрагічна дзякуючы не толькі сігналу пажарнага апавяшчальніка. Гаспадары дзейнічалі правільна і хутка.
Зараз вялікая сям'я гасцюе ў сваякоў. Хваляванне пераадолелі, сцэнарый начнога здарэння пракруцілі некалькі разоў. Саша і Дзяніс хаця і не былі сведкамі пажару, але упэўнены: пры неабходнасці дзейнічалі б як трэба.
Ад ратавальнікаў Андрэевы атрымалі і новы аўтаномны пажарны апавяшчальнік з пажаданнямі, каб у новым адрамантаваным доме ён больш ніколі не гучаў.
Прычынай пажару ў Заслаўі магло стаць замыканне электраправодкі
25 марта 2019