Ачаг захворвання адром у Ваўкавыску працягваюць устанаўліваць спецыялісты

12 Сакавіка 2018

Ужо абследаваны некалькі тысяч чалавек. У горадзе створаны спецыяльны прышчэпачны пункт для тых, каму неабходная вакцынацыя. Пад назіраннем урачоў застаюцца яшчэ 5 хворых, 20 чалавек ужо выпісаныя з бальніцы. Як пацвердзілі Агенцтву тэленавін у Міністэрстве аховы здароўя, вірус адру, найбольш імаверна, мог быць завезены ў краіну. Новыя падрабязнасці ў Дзмітрыя Смірнова.

Зараз у інфекцыйным аддзяленні цэнтральнай бальніцы Ваўкавыска знаходзяцца 5 пацыентаў з падазрэннем на адзёр. Двое дзяцей, адно з якіх не было прышчэплена, і яшчэ трое дарослых. Прышчэпачны статус 2 з іх урачам невядомы, а трэці пацыент атрымаў прышчэпку больш за 15 гадоў таму.

Урачы пацвярджаюць, што адсутнасць вакцынацыі супраць гэтай хваробы - агульны фактар для ўсіх хворых. З 19 лютага, г.з. з моманту рэгістрацыі першага выпадку віруса ў Ваўкавыску, медыкі клінічна і лабараторна пацвердзілі дыягназ "адзёр" у 20 мясцовых жыхароў. Усе яны ўжо выпісаныя з стацыянара - зараз у палатах застаюцца толькі 5 пацыентаў.

Сам жа вірус вельмі актыўны. Дастаткова аднаго агульнага памяшкання або нават размовы побач, каб непрышчэплены чалавек захварэў. Дадатковая складанасць у тым, што першыя 3-4 сутак адзёр нельга адрозніць па сімптомах ад прастуды. Таму апошнія тыдні ўрачы ў Ваўкавыску, акрамя лячэння, займаюцца яшчэ пошукам кантактных асоб - тых, хто мог заразіцца. Правераны ўжо тысячы людзей. Спецыяльна створаны прышчэпачны пункт, дзе вакцынуюць зараз тых, у каго ёсць рызыка заразіцца.

На думку экспертаў Міністэрства аховы здароўя, гэты вірус, хутчэй за ўсё, быў завезены ў Беларусь.

Сёння, паводле слоў экспертаў, рызыка далейшага распаўсюджвання інфекцыі зведзена да мінімуму. За мінулыя суткі новых выпадкаў хваробы ў горадзе не выяўлена.

Пацыентаў, якія зараз праходзяць лячэнне ў ваўкавыскай клініцы, урачы плануюць выпісаць дахаты ў найбліжэйшыя некалькі дзён.