Нелегалы па-варварску выграбаюць пяшчаныя кар'еры.
Не спыняюць іх і прыродаахоўныя тэрыторыі. У выніку экасістэма гіне, змяняецца ландшафт, гінуць дрэвы. Пакутуюць ад несумленнай канкурэнцыі і добрасумленныя пастаўшчыкі пяску, якія літаральна губляюць свае грошы. Як выкараніць самавольную здабычу прыродных рэсурсаў - разбіралася Вікторыя Патоня.
Пётр Брыш, начальнік Брэсцкай гарадской раённай інспекцыі прыродных рэсурсаў і аховы навакольнага асяроддзя: "Мы знаходзімся ў водаахоўнай зоне ракі Мухавец. Атрымліваецца, гэта паміж дарогай і самой ракой. Адлегласць да ракі каля 100 метраў. Тут ніякіх прац па здабычы пяску не можа быць".
У маляўнічым урочышчы Чырвоны Двор на ўскраіне Брэста такі кар'ер не адзіны. Пясок тут здабываюць незаконна і з зайздроснай перыядычнасцю. Вывозяць на будаўніцтва прыватных дамоў. У капальшчыкаў пры гэтым няма не толькі дакументаў на здабычу пяску, але і сумлення. Ад такога варварства пакутуюць дрэвы, руйнуецца ўрадлівы слой зямлі. Пасля сябе нелегалы пакідаюць кар'еры глыбінёй больш як 2 метры.
Здабыча пяску ператварылася ў сапраўдны чорны бізнес. Капальшчыкі вывозяць яго тонамі. Прычым, злавіць іх за руку вельмі праблематычна. Працаваць яны могуць у любы час сутак: альбо днём, альбо ўначы. Не спыняюць удзельнікаў незаконнай здабычы нават штрафы.
Таццяна жыве непадалёк, часта прагульваецца ўздоўж ракі. Гаворыць, не раз назірала, як у лесе працуе тэхніка.
Адчувальныя не толькі экалагічныя, але і эканамічныя страты. Канкурэнцыю, у тым ліку і ад нелегальнай здабычы, адчуў на сабе і найбуйнейшы пастаўшчык пяску ў абласным цэнтры - Брэсцкі рачны порт. Сёлета тут упалі продажы для насельніцтва ў чатыры разы. У кошт тоны пяску закладзеная зарплата працаўнікоў, падатак на зямлю і выдаткі па здабычы сыравіны.
За нелегальную здабычу пяску прадугледжаныя штрафы - максімум 630 рублёў. Але і гэтая сума капальшчыкаў часцей за ўсё не спыняе.
Спецыялісты лічаць: каб выкараніць самавольную здабычу пяску, неабходна канфіскаваць тэхніку. Таму ў месцах, дзе вядзецца нелегальная здабыча пяску, ужо зусім хутка з'явяцца фотапасткі.
