Сёння МУС агучыла падрабязнасці гучнай справы аб дамоўных матчах. Напрыклад, ёсць усе падставы лічыць, што футбалісты, якія ні разу не выходзілі на газон, прымалі актыўны ўдзел у нелегальных стаўках. Гэтыя гульцы падавалі ўмоўныя сігналы партнёрам па камандзе. Першым чынам, гаворка ідзе аб матчы "Баранавічы" - "Ашмяны", ён адбыўся 5 чэрвеня і скончыўся з лікам 1:0. На такі зыход гульні паўплывалі двое ўкраінцаў, праз беларуса яны падкупілі футбалістаў "Ашмянаў". У МУС лічаць, што падчас згаданай сустрэчы адну з асноўных роляў сыграў гулец, які знаходзіўся на лаўцы запасных "Ашмянаў" і перадаваў умоўныя сігналы калегам.
І напярэдадні была ўзбуджаная крымінальная справа па артыкуле "Подкуп удзельнікаў і арганізатараў прафесійных спартыўных спаборніцтваў і відовішчных камерцыйных конкурсаў". На сёння падазронымі па справе, акрамя заказчыкаў і пасрэдніка, прызнаныя пяць гульцоў футбольнага клуба "Ашмяны", яны затрыманыя. Дарэчы, у МУС падкрэслілі, што падчас расследавання яны цесна супрацоўнічаюць з Беларускай федэрацыяй футбола.
