У гучным працэсе па справе былога генеральнага дырэктара хакейнага клуба "Дынама-Мінск" сёння пастаўленая кропка. Максім Суботкін прызнаны вінаватым, пакаранне - 5 гадоў пазбаўлення волі з канфіскацыяй маёмасці. Я нагадаю, функцыянера затрымалі яшчэ ў ліпені мінулага года. Следства лічыць, што былы топ-менеджар, перавысіўшы паўнамоцтвы, завалодаў грашыма хакейнага клуба. Суму ў памеры больш як 2 мільярды рублёў Суботкін пакрыў. Але ў памілаванні яму адмовілі. У зале суда сёння знаходзілася і наша здымачная група. З падрабязнасцямі - Юрый Шаўчук.
Стары будынак суда Першамайскага раёна Мінска відавочна не прызначаны для такой колькасці журналістаў, якія сабраліся сёння на абвяшчэнне прысуду. На працягу ўсяго судовага працэсу над экс-дырэктарам хакейнага клуба "Дынама" прэса выдавала гарачыя загалоўкі з залы суда: "Я не браў ні капейкі з кішэні клуба", "Суботкін расплакаўся ў зале суда", "Падстаўны бард, дачка генерала і тэлевядучы" - гэта толькі некаторыя "нятленкі". І вось феміда нарэшце-та ставіць кропку ў гэтым гучным судовым працэсе.
У сваю чаргу пракурор прасіў прызначыць суд пакаранне Суботкіну ў выглядзе 6 гадоў пазбаўлення волі. Ці будзе бок абвінавачання абскарджваць прысуд, стане вядома толькі пасля таго, як дзяржабвінаваўца цалкам азнаёміцца з арыгіналам пастановы суда.
Аляксандр Андрэеў, дзяржабвінаваўца: "Дзеянні Суботкіна, раней кваліфікаваныя па артыкуле 210, перакваліфікаваныя ў артыкул 428 КК РБ. Пасля вывучэння ў поўным аб'ёме прысуду будзе прынята канчатковае рашэнне аб апратэставанні дадзенага судовага рашэння".
Што ж датычыцца асуджанага, на адным з допытаў ён часткова прызнаў сваю віну. Але заявіў, што ў яго не было карыслівага матыву. А яшчэ ён не атрымліваў ад свайго змоўшчыка і экс-топ-менеджара Уладзіміра Беражкова грошай, знятых з карткі "мёртвай душы" Леаніда Сагындыкава. Нагадаю, як гэтая гісторыя пачыналася: спартыўны функцыянер быў затрыманы ў ліпені мінулага года. Дырэктара хакейнага клуба "Дынама" абвінавацілі ў злоўжыванні службовымі паўнамоцтвамі. Паводле версіі следства, з-за дзеянняў падсуднага каманда страціла 2 мільярды 300 мільёнаў недэмінаваных рублёў. Дарэчы, усю гэтую суму Суботкін ужо пакрыў, але гэта так і не дапамагло яму сысці ад пакарання.
Паводле закону, на тое, каб абскардзіць прысуд суда, і ў бока абароны, і ў бока абвінавачання будзе роўна 10 дзён. Але калі дзяржабвінаваўца адпаведныя дакументы можа забраць адразу пасля вердыкта феміды, то падсуднаму іх выдадуць толькі на працягу некалькіх дзён.
