Гомельскія медыкі гатовы дапамагчы транспарціраваць пацярпелых у ДТЗ беларусаў з Украіны на радзіму

4 Кастрычніка 2018

Паводле слоў урачоў, траіх змогуць забраць ужо заўтра. Нагадаем, аварыя з удзелам нашых грамадзян адбылася сёння раніцай на трасе Адэса - Кіеў. Мікрааўтобус на гомельскіх нумарах сутыкнуўся з грузавым кранам. У той момант у салоне знаходзіліся 8 чалавек, шасцёра дастаўлены ў бальніцу. Аляксандр Камовіч - прадоўжыць.

Паведамленне аб ДТЗ з беларусамі ў раёне горада Крывое Возера Мікалаеўскай вобласці паступіла ў паліцыю Украіны сёння раніцай. Паводле інфармацыі ведамства, мікрааўтобус "Мэрсэдэс", у якім знаходзіліся 8 чалавек, сутыкнуўся са спадарожным грузавым кранам. У выніку аварыі пацярпелі 6 беларусаў, а таксама жыхар Кіева.

Увесь дзень на месцы здарэння працавала следчая група. Зараз ім трэба будзе высветліць усе прычыны і акалічнасці аварыі. Пакуль папярэдняй версіі праваахоўнікі не агучваюць. Аб здарэнні аператыўна праінфармавалі пасольства Беларусі.

Уладзімір Чахлоў, старшы саветнік, консул пасольства Беларусі ва Украіне, па тэлефоне:

"Усе яны зараз знаходзяцца ў цэнтральнай раённай бальніцы горада Крывое Возера Мікалаеўскай вобласці. Пасольства ў кантакце з кампетэнтнымі органамі Рэспублікі Беларусь і мясцовымі органамі Украіны. Праводзіцца работа па аказанні неабходнай дапамогі пацярпелым беларускім грамадзянам".

Вядома, што вадзіцель грузавога крана не пацярпеў. Паводле інфармацыі паліцыі Украіны, яшчэ адзін беларус пакінуў месца ДТЗ самастойна. Сярод пацярпелых дзяцей няма, гэта сталыя людзі ад 43 да 64 гадоў.

Іна Парфёнава, спікер паліцыі Мікалаеўскай вобласці Украіны, па тэлефоне:

"Інфармацыя аб дарожна-транспартным здарэнні занесена ў Адзіны рэестр дасудовых расследаванняў. Папярэдне па прыкметах ч. 2 арт. 286 Крымінальнага кодэкса Украіны. Санкцыя артыкула прадугледжвае пакаранне ў выглядзе пазбаўлення волі на тэрмін ад трох да васьмі гадоў. Зараз праводзяцца ўсе неабходныя следчыя дзеянні, якія дапамогуць усталяваць усе акалічнасці ДТЗ і прычыны. Аб дадзенай падзеі апавешчана Міністэрства замежных спраў".

Акрамя таго, следчым атрымалася пагутарыць і з некаторымі пацярпелымі беларусамі. Аднак пакуль іх стан не палепшыцца, высновы рабіць рана.

Адзначым, што беларускія медыкі падтрымліваюць сувязь са сваімі ўкраінскімі калегамі. Акрамя таго, гомельскія медыкі гатовы даставіць пацярпелых на радзіму.

Ігар Баранаў, начальнік галоўнага ўпраўлення аховы здароўя Гомельскага аблвыканкама:

"Паводле звестак апошняй гадзіны, мы вядзём размову аб магчымасці транспарціроўкі 4 пацыентаў. Па астатніх пацыентах з улікам іх стану і магчымасці па медыцынскіх паказаннях, пытанне транспарціроўкі будзе разгледжана ў найбліжэйшы час. Мы плануем па трох пацыентах ужо адназначна, 4 пад пытаннем, плануем транспарціраваць іх ужо заўтра".

Дададзім, што сітуацыя знаходзіцца на асабістым кантролі і міністра аховы здароўя Беларусі. Мы таксама будзем сачыць за развіццём падзей.