Паводле інфармацыі МУС, аперацыю правялі ў мінулы чацвер, 7 лютага, аператыўнікі Галоўнага ўпраўлення па барацьбе з аргзлачыннасцю і карупцыяй. Паведамляецца, што 20 тысяч еўра топ-менеджар атрымаў ад прадстаўніка замежнай камерцыйнай структуры. Прычым адбылася перадача незаконнай узнагароды прама ў рабочым кабінеце. Грошы падазроны атрымаў за своечасовае выкананне заводам сваіх дагаворных абавязацельстваў, звязаных з разлікамі за тэхналагічнае абсталяванне, якое праходзіла ў рамках дзяржпраграмы мадэрнізацыі найважнейшых прамысловых прадпрыемстваў. Таксама міліцыі ўдалося высветліць, што ў 2018 годзе гендырэктар завода ўжо неаднаразова атрымліваў хабары ад прадстаўнікоў камерцыйных структур за вырашэнне пытанняў, што ўваходзяць у яго кампетэнцыю. Зараз праваахоўнікі ўстанаўліваюць кола карупцыйных сувязяў затрыманага. У дачыненні да кіраўніка ўзбуджана крымінальная справа па артыкуле "Атрыманне хабару ў асабліва буйным памеры асобай, якая займае адказнае становішча".
