Надзвычайнае здарэнне ў Віцебскай вобласці. Сёння раніцай тут адбылася аварыя з удзелам школьнага аўтобуса і маршрутнага таксі. Мікрааўтобус з дзевяццю пасажырамі ад удару перакуліўся, пацярпелі 4 чалавекі. Яны дастаўленыя ў бальніцу. У школьным аўтобусе знаходзіліся 15 дзяцей. На шчасце, з іх ніхто не пацярпеў. На месца аварыі выехала наша здымачная група. Вольга Маслоўская падрабязна.
Урокі ў Ржаўскай школе па раскладзе. Толькі 14 вучняў ад заняткаў сёння вызвалены. З імі і яшчэ адным малым - выхаванцам дзіцячага садка - працуе псіхолаг. Раніцай на школьным аўтобусе дзеці трапілі ў аварыю.
Вольга Качан, намеснік дырэктара Ржаўскай дзіцячага садка - сярэдняй школы: "Вучні былі з 1-га па 11-ы класы. Кожны па-рознаму перажыў гэта. Агледзелі медыкі, усё нармальна".
Дзяцей з невялікіх вёсак жоўты ПАЗ кожную раніцу падвозіць у школу і назад. Маршрут стандартны. Але сёння дарога да ведаў аказалася небяспечнай. У 7:45 аўтобус з другараднай дарогі выехаў на скрыжаванне і, не саступіўшы шлях маршрутнаму таксі, сутыкнуўся з ім.
Ад удару "газель" перакулілася і легла на бок. Дзверы аказаліся заблакіраваныя. Пасажыры выбіраліся праз пабітыя вокны і люк.
Мікрааўтобус накіроўваўся з горада Чашнікі ў Віцебск. Па заяўцы аблваенкамата ён павінен быў даставіць прызыўнікоў у абласны цэнтр.
Людміла Абрамава, інжынер па ахове працы і бяспецы руху філіяла АТП № 9 г. Чашнікі ААТ "Віцебскаблаўтатранс": "Мы падалі аўтобус да 7 гадзін раніцы. Вадзіцель прайшоў перадрэйсавы агляд, Тэхнічны сродак быў спраўны".
Усіх пасажыраў маршруткі даставілі ў Бешанковіцкую бальніцу. Пяцярых з нязначнымі траўмамі адпусцілі дахаты. Пад назіраннем урачоў застаюцца 4 чалавекі. Дзмітрый Петрушэнка момант аварыі не памятае, ён спаў. Прачнуўся ўжо на дарозе. Гаворыць, нарадзіўся ў кашулі, бо ўдар аўтобуса прыпаў на яго бок.
На месцы аварыі працавалі следчыя і эксперты. Па факце ДТЗ праводзіцца праверка. Спецыялістам трэба будзе аднавіць поўную карціну здарэння. Ужо вядома, што вадзіцелі на момант аварыі былі цвярозымі.