Следчы камітэт Магілёва завяршыў расследаванне ў дачыненні да некалькіх фірм-аднадзёнак. Фіктыўныя дакументы, якія дапамагалі адмываць грошы, вёў сямейны падрад. На лаве падсудных апынуліся блізкія не толькі па бізнесе людзі. Чым абернецца махлярства на мільярды?
У таемных схемах аферыстаў разбіраўся Уладзімір Каралёў.
Справа, якая прэтэндуе на галоўную аферу года. 117 тамоў матэрыялаў справы. Аб усіх махінацыях, якія знайшлі следчыя, яшчэ толькі трэба будзе азнаёміцца ў эканамічным судзе Магілёва. Бок абвінавачання настойвае - на працягу некалькіх гадоў сямейны бізнес прыносіў каласальны прыбытак. Агульная сума толькі нявыплачаных падаткаў склала 59 мільярдаў рублёў.
Зараблялі на шчаслівую будучыню аферысты незвычайнай схемай - на дакументах. Яны друкавалі загадзя фіктыўныя паперы аб тым, што адна кампанія перакупіла тавар у другой, натуральна, па безнаяўным разліку, натуральна, па цане вышэйшай за першапачатковую. Каб вывесці грошы з абароту, фірма-аднадзёнка афармляла пазыку на патрэбную суму, а пасля аддавала грошы ўжо наяўнымі. На працэнт ад здзелкі аферысты і жылі.
Дакладная колькасць фірмаў, якія карысталіся паслугамі лжэпрадпрымальніцкіх структур, следчыя не называюць. Вядома, што гэта былі кампаніі Мінска і Магілёва, якія прадавалі абсалютна розныя тавары - ад прадуктаў харчавання, мэблі і аргтэхнікі да металу і будаўнічых матэрыялаў.
Выйсці на аферыстаў удалося яшчэ летась. Тады фінансавая міліцыя ўзбудзіла крымінальную справу ў дачыненні да аднаго з кіраўнікоў прыватнай фірмы, падазраючы жыхара Магілёва ва ўхіленні ад выплаты падаткаў. Вопытныя следчыя вырашылі праверыць усю паднаготную кампаніі і не пралічыліся. Гадамі адны і тыя ж людзі ад імя кіраўнікоў розных фірмаў адводзілі грошы ў ценявы абарот.
Калі бок абвінавачання зможа даказаць, што фірмы, падкантрольныя затрыманым, насілі статус "фінансавых пральняў", абвінавачаным пагражаюць штрафы і зусім рэальныя тэрміны з канфіскацыяй маёмасці, якая ўжо арыштавана. А самі падсудныя, часткова прызнаўшы сваю віну, яшчэ да суда пачалі пагашаць урон.
