Праект "Жанчыны і спорт" пачаў выходзіць у 2016 годзе напярэдадні галоўных Гульняў чатырохгоддзя ў Рыа-дэ-Жанэйра. Ён аказаўся запатрабаваным не толькі ў тэлегледачоў, але і ў чыноўнікаў са свету спорту. У тым жа годзе аўтар і вядучая праграмы Ганна Эйсмант была адзначаная высокай узнагародай - дыпломам Міжнароднага алімпійскага камітэта.

У другім сезоне праект "Жанчыны і спорт" працягне распавядаць пра самых знакамітых спартсменак Беларусі. У Лондане Ганне Эйсмант атрымалася пагутарыць з новымі зоркамі беларускага тэніса Аляксандрай Сасновіч і Арынай Сабаленкай. Перад важнымі матчамі кваліфікацыі на чэмпіянат Еўропы па баскетболе гледачоў чакае сустрэча з галоўным трэнерам жаночай зборнай Беларусі Наталляй Трафімавай, а таксама асобная праграма будзе прысвечаная цэнтравой турэцкага БК "Фенербахчэ" Анастасіі Верамеенцы, якая пакажа журналістам, дзе жыве ў Стамбуле і дзе трэніруецца. Эксклюзівам будуць напоўненыя выпускі пра беларускіх гімнастак Любоў Чаркашыну і Кацярыну Галкіну, біятланістак Ірыну Крыўко і Дар'ю Алімбекаву, а таксама пра чатырохразовую алімпійскую чэмпіёнку Дар'ю Домрачаву.