Цыкл фільмаў "Справа жыцця" падрыхтаваны творчай групай Агенцтва тэленавін медыяхолдынга. 2017-ы аб’яўлены Годам навукі ў нашай краіне, і ў гледачоў тэлеканала "Беларусь 1" з'явіцца магчымасць убачыць, як перадавыя ідэі айчынных даследаванняў рэалізуюцца на практыцы і для каго гэта становіцца справай усяго жыцця.

"Справа жыцця" - дванаццаць 15-хвілінных фільмаў, дзе ў кожнай серыі распавядаецца гісторыя адной навуковай ідэі, аўтары якой вылучаныя на суісканне Дзяржаўных прэмій Рэспублікі Беларусь у галіне навукі і тэхнікі 2016 года. З панядзелка па чацвер у вячэрнім эфіры "Беларусь 1" шырокай тэлеаўдыторыі канала будуць прапанаваныя самыя яркія і неардынарныя гісторыі аб тым, як даследчыкі прыходзяць да арыгінальнай і непаўторнай ідэі, як працуюць над ёй многія гады і якім чынам рэалізуюць яе.

"Мы хацелі паказаць лёсы людзей, якія апантаныя сваёй справай, што дазволіла ім аб'яднаць імкненні на адным даследчым шляху. Менавіта такое адзінства дапамагае ўвасобіць навуковую ідэю ў жыццё. Аднак часцяком мы радуемся выніку і забываем пра канкрэтных людзей, якія за ім стаяць. Было вырашана ў Год навукі абавязкова распавесці пра гэтых людзей, каб беларусы ведалі сваіх герояў у твар", - адзначыў адзін з суаўтараў праекта "Справа жыцця" Руслан Туркоў.

Кожная серыя цыкла распавядае пра адзін з перадавых кірункаў беларускай навукі, ці то медыцына, культура, машынабудаванне, гісторыя, сацыяльная або іншыя сферы дзейнасці.

Журналісты Агенцтва тэленавін Белтэлерадыёкампаніі працягваюць праект “Справа жыцця” аповедам пра айчынныя дасягненні ў сферы культуры і мастацтва.

Новыя выпускі прысвечаны творчым работам, пададзеным на суісканне Дзяржаўных прэмій Рэспублікі Беларусь у галінах літаратуры, мастацтва і архітэктуры 2016 года. Гэта 8 дакументальных фільмаў на беларускай мове пра заслужаных дзеячаў і калектывы, якія дасягнулі творчых вяршынь дзякуючы шматгадовай працы і значнаму ўнёску ў культурную спадчыну краіны.

Тэлегледачы змогуць убачыць выпускі, прысвечаныя стварэнню ўнікальных серый кніг пра беларускіх дзеячаў культуры, кніг для дзяцей, дакументальных фільмаў пра Вялікую Айчынную вайну, лепшых беларускіх драматычных спектакляў і канцэртаў-спектакляў, цудоўных мемарыялаў і скульптурных кампазіцый пагранічнай тэматыкі, арыгінальнай музыкі да балетаў і мюзіклаў. 

Праект “Справа жыцця” ўзгадае пра неверагодныя дасягненні ў мастацтве такіх легендаў як Уладзімір Кандрусевіч, Анатоль Алай і Расціслаў Янкоўскі.