"Народная раніца" раскажа пра людзей працы

27.04.2016
Свята працы - 1 Мая - у эфіры "Беларусь 1" пачнецца з прэм'еры новай праграмы "Народная раніца". Гэта сумесны праект Белтэлерадыёкампаніі і Федэрацыі прафсаюзаў Беларусі.

Прэс-рэліз

Свята працы - 1 Мая - у эфіры "Беларусь 1" пачнецца з прэм'еры новай праграмы "Народная раніца". Гэта сумесны праект Белтэлерадыёкампаніі і Федэрацыі прафсаюзаў Беларусі. Рыхтуе "Народную раніцу" творчая каманда журналістаў тэлерадыёкампаніі "Віцебск".

Праграма будзе распавядаць пра людзей працы, яе мэта - даступна данесці карысную інфармацыю, аказаць юрыдычную і іншую дапамогу.

Стваральнікі праекта выбралі цікавы фармат - камандзіроўка пасля атрымання ліста. Кожны, хто жадае, можа накіраваць ліст на адрас 220126, Мінск, пр. Пераможцаў, 21, штаб-кватэра ФПБ з аповедам пра блізкага чалавека, сябра, калегу, растлумачыўшы пры гэтым, чаму менавіта ён павінен стаць героем праграмы.

Далей вядучы са здымачнай групай прыязджае ў госці да выбранага героя праграмы, размаўляе з ім і членамі сям'і. Акрамя самой гутаркі, у кожны выпуск "Народнай раніцы" будуць уключаныя спецыяльныя рубрыкі-сюжэты.

"Дарэчы, удзельнікам гэтай сапраўды народнай праграмы можа стаць і кожны жыхар таго раёна, адкуль і галоўны герой выпуску, - распавяла куратар праекта ад Белтэлерадыёкампаніі, загадчыца аддзела вытворчасці тэлевізійных праграм ТРК "Віцебск" Ксенія Асмалоўская. - Напярэдадні прыезду "народнага аўтобуса", які лёгка пазнаць па спецыяльных рэкламных малюнках з лагатыпам нашай праграмы, у мясцовых СМІ і працоўных калектывах будзе аб'яўлена аб даце і часе сустрэчы з экіпажам "Народнай раніцы". У яго складзе - прафсаюзныя лідары, артысты, юрысты, урачы і іншыя спецыялісты, гатовыя даць прафесійную кансультацыю".

Таксама загадзя ва ўсіх пярвічных прафсаюзных арганізацыях усталёўваюцца спецыяльныя скрыні для пытанняў, зваротаў, скаргаў, падзяк. Найбольш актуальныя пытанні, працоўныя спрэчкі, жыццёвыя сітуацыі будуць разгледжаныя ў рубрыках "Народнай раніцы".

Вядучыя праграмы - журналіст ТРК "Віцебск" Ксенія Асмалоўская і начальнік галоўнага ўпраўлення па культуры і грамадскай працы апарату Савета ФПБ Глеб Лапіцкі. Праект "Народная раніца" будзе выходзіць кожную нядзелю.

Першы выпуск гледачы тэлеканала "Беларусь 1" убачаць 1 мая ў 8:30.