"ЛАД" прапануе прэм'еру дакументальнага фільма "Трэці званок для дваіх"

24.03.2010

Прэс-рэліз    27 сакавіка, у Міжнародны дзень тэатра, тэлеканал "ЛАД" прапануе прэм'еру дакументальнага фільма "Трэці званок для дваіх" аб народных артыстах Рэспублікі Беларусь Галіне Талкачовай і Аўгусце Мілаванаве.


Прэс-рэліз


27 сакавіка, у Міжнародны дзень тэатра, тэлеканал "ЛАД" прапануе прэм'еру дакументальнага фільма "Трэці званок для дваіх" аб народных артыстах Рэспублікі Беларусь Галіне Талкачовай і Аўгусце Мілаванаве. Фільм створаны на студыі дакументальнага кіно Белтэлерадыёкампаніі, аўтар сцэнарыя - тэатразнавец Ізабела Гатоўчыц, рэжысёр - Валерый Гаравой.
Героі фільма - муж і жонка Галіна Талкачова і Аўгуст Мілаванаў, народныя артысты Рэспублікі Беларусь.
І праз жыццё, і праз творчасць Галіна і Аўгуст пранеслі каханне адно да аднаго. Пачуццё, якое з гадамі зусім не стала менш яркім...
Ледзь не кожную сцэнічную працу акцёраў можна назваць "Яшчэ раз пра каханне".
Галіна Талкачова прыйшла ў Нацыянальны акадэмічны тэатр імя Янкі Купалы пасля тэатральнага інстытута. І адразу ж была заўважана мінскай публікай у спектаклі "Забыты ўсімі" Назыма Хікмета. За сваю акцёрскую кар'еру Галіна Талкачова выканала шмат роляў. Гэта і Зося з "Сэрца на далоні" Шамякіна, маці з "Зацюканага апостала" Макаёнка, Ірына з "Апошняй ахвяры" Астроўскага...
Прычым Галіна ні разу не пабаялася ўзроставай ролі, галоўным заўсёды заставалася ўнутраная драматургія персанажа.
Аўгуст Мілаванаў прыйшоў у тэатр пазней, у 1962 годзе.
Аўгуст - акцёр інтэлектуальнага тэатра. Яго сцэнічным героям уласціва чароўнасць і людскасць. Цяўе-малочнік у "Памінальнай малітве" Рыгора Горына, Ромул у "Ромуле Вялікім" Фрыдрыха Йозефа Дзюрэнмата, Гэлі Гэй у "Што той салдат, што гэты" Брэхта Бертольда і дзесяткі іншых роляў... Усё гэта Аўгуст Мілаванаў. "Што я магу дадаць да самога фільма? Я ўсё ўжо ў ім распавёў", - гаворыць аб "Трэцім званку для дваіх" рэжысёр Валерый Гаравой.
"Гэты фільм - вынік працы, калі ўвесь калектыў стараўся, ніхто ні разу не схалтурыў і не паленаваўся. Добрае стаўленне да герояў адчуваецца ў кожным кадры", - дзеліцца ўражаннямі аўтар сцэнарыя Ізабела Гатоўчыц.
Прэм'ера дакументальнага фільма "Трэці званок для дваіх" - 27 сакавіка ў дзённым эфіры тэлеканала "ЛАД".