Тэлеканалы Белтэлерадыёкампаніі будуць весці трансляцыю XXI зімовых Алімпійскіх гульняў у Ванкуверы. У эфіры Першага і "ЛАДа" запланаваны 162 гадзіны трансляцый з Канады: цырымоніі адкрыцця і закрыцця, самыя відовішчныя і цікавыя беларускім спартыўным балельшчыкам спаборніцтвы, а таксама штодзённыя агляды ў "Дзённіках Алімпіяды".

На працягу многіх гадоў Белтэлерадыёкампанія з'яўляецца эксклюзіўным вяшчальнікам Алімпіяд у нашай краіне. Сёлета ў эфіры Першага і "ЛАДа" аматараў спорту чакаюць як прамыя тэлетрансляцыі хакейных матчаў, біятлонных гонак, скачкоў з трампліна і спаборніцтваў фрыстайлістаў, так і спаборніцтвы, паказаныя ў запісе ў найбольш зручны для гледачоў час,  з улікам розніцы гадзінных паясоў. Традыцыйныя "Дзённікі Алімпіяды" і паведамленні ў "Навінах" прапануюць агляды дня і дадуць магчымасць зазірнуць у спартыўнае алімпійскае закуліссе.

Трохтыднёвы тэлемарафон стартуе напярэдадні адкрыцця Алімпіяды, 12 лютага, калі Першы ў вячэрнім эфіры пакажа першы "Дзённік".