Трыумф. Героям спорту 2016

лого Триумф.png

Лепшыя спартсмены і трэнеры будуць вызначаныя падчас адкрытага публічнага конкурсу "Трыумф. Героям спорту"

25 лютага вырашыцца інтрыга адкрытага публічнага конкурсу "Трыумф. Героям спорту": падчас урачыстай цырымоніі ўзнагароджання пераможцаў будуць названыя імёны лепшых беларускіх спартсменаў і трэнераў па выніках 2015-2016 гг. Убачыць яскравае шоу змогуць і тэлегледачы - трансляцыя ўшаноўвання трыумфатараў будзе ажыццяўляцца ў суботу ў вячэрнім эфіры тэлеканалаў "Беларусь 1" і спадарожнікавага "Беларусь 24" .

Нагадаем, падчас конкурсу беларускія аматары спорту і прафесійнае журы вызначалі спартсменаў, якія дамагліся ў 2015-2016 гг. найбольш значных вынікаў на буйных афіцыйных міжнародных спаборніцтвах.

Вынікі конкурсу падводзяцца ў наступных намінацыях: "Лепшая каманда", "Лепшы спартсмен", "Лепшая спартсменка", "Лепшы трэнер", "За волю да перамогі", "Прарыў", "Вынік" і "Самы яркі спартыўны момант", у кожнай з якіх будзе названы адзін пераможца.

Фіналам праекта стане цырымонія ўрачыстага ўзнагароджання пераможцаў і гала-канцэрт артыстаў беларускай эстрады. Мерапрыемства пройдзе 25 лютага ў спартыўна-забаўным комплексе Falcone Club.

Сярод запрошаных выканаўцаў - Іскуі Абалян, афіцыйны прадстаўнік Беларусі на конкурсе "Еўрабачанне-2017" гурт NAVIBAND, Улада, Саша Нема, Вольга Плотнікава, Тэа і іншыя. Артысты не толькі выканаюць упадабаныя хіты, але і парадуюць прэм'ерамі.

Весці маляўнічае шоу будуць Вольга Рыжыкава і Дзмітрый Бачкоў.

Трансляцыю цырымоніі 25 лютага ў 21:35 пакажуць тэлеканалы "Беларусь 1" і "Беларусь 24". 26 лютага ў 10:20 убачыць цырымонію ўзнагароджання змогуць і гледачы спартыўнага тэлеканала "Беларусь 5".

Конкурс "Трыумф. Героям спорту" праводзіцца з мэтай  садзейнічання ўсебаковаму і гарманічнаму развіццю асобы, прапагандзе прынцыпаў і ідэалаў алімпійскага і паралімпійскага рухаў, фарміраванню іміджу Рэспублікі Беларусь як сусветнай спартыўнай дзяржавы, прыцягнення ўвагі шырокага кола грамадзян і арганізацый да развіцця нацыянальнага спорту вышэйшых дасягненняў.

Нагадаем, што раней герояў спорту беларускія балельшчыкі выбіралі ў праектах "Навагодні баль 2007. Героям спорту", "Трыумф. Героям спорту 2008", "Трыумф. Героям спорту 2010", "Трыумф. Героям спорту 2012", "Трыумф. Героям спорту 2014", якія праводзіліся гэтымі ж арганізатарамі. Мінулыя конкурсы не толькі былі сапраўднай падзеяй у айчынным спорце, але і станавіліся ўнікальнымі тэлепраектамі, збіраючы, без перабольшанняў, вялізную аўдыторыю.