Пра гэта Кіраўнік дзяржавы заявіў сёння, заслухоўваючы даклад аб экспарце круглых лесаматэрыялаў. Са студзеня мінулага года ўказам Прэзідэнта ўведзена забарона паставак за мяжу неапрацаванай драўніны. Выключэнне - форс-мажорныя акалічнасці, напрыклад, масавы вал дрэў з-за ўрагану. У 2016 і першай палове гэтага года Мінлясгас атрымаў дазвол экспартаваць 4 мільёны кубаметраў сыравіны. Гэта распілаванае бярвенне, у тым ліку і лес, павалены ліпеньскімі ўраганамі. У краіне назіраецца прафіцыт сыравіны. Летась нарыхтаваны рэкордны аб'ём - 21 мільён кубаметраў. З-за таго, што некаторыя прадпрыемствы канцэрна Беллеспаперапрам не загружаныя, бо знаходзяцца ў стадыі мадэрнізацыі, урад прапануе прадоўжыць дзеянне квот. Экспарт лесу не разглядаецца як самамэта. Асноўная задача па-ранейшаму ў забеспячэнні сыравінай унутранага рынку і як вынік выпуск экспартна арыентаванай прадукцыі.
Сёлета за мяжу адправіцца партыя ў амаль 2 мільёны кубаметраў круглага лесу. Тым не менш Кіраўнік дзяржавы папярэдзіў Мінлясгас, што гэты дазвол стане апошнім. Патрабаванне нязменнае: уся драўніна павінна перапрацоўвацца ўнутры краіны. У лістападзе адкрыецца новы завод Светлагорскага цэлюлозна-кардоннага камбіната. Менавіта на гэта прадпрыемства будзе пастаўляцца той аб'ём драўніны, які зараз экспартуецца за мяжу ў круглым выглядзе.
Сярод ключавых даручэнняў Прэзідэнта - выкараненне шэрых схем вывазу драўніны. Урад ужо прыняў меры, каб піловачнік не ішоў на экспарт пад выглядам калоў і слупоў. Пастанова аб ліцэнзаванні гэтых відаў прадукцыі ўступае ў сілу 1 лютага. А вось дата 1 мая стане апошняй для навядзення парадку ў лясах Беларусі. Караць будуць рублём. Кіраўнік дзяржавы прапануе павялічыць штрафы за вываз смецця на тэрыторыю лясных масіваў.