Культура

Спампаваць

17 Лютага 2017 18:57

Рубрыка "Праменад"

Беларуская манументальная кераміка і жывапіс у сталічным Палацы мастацтваў. У Мінск прывезлі калекцыю Мацея Радзівіла, а піяніст з сусветным імем Дзяніс Мацуеў выступіць з новай праграмай на сцэне Палаца Рэспублікі. Як правесці выхадныя нясумна, падкажа рубрыка "Праменад" з Ларысай Гулякевіч.

Сустрэча з Барбарай Радзівіл - каралевай Польшчы, Мікалаем Хрыстафорам Радзівілам Сіроткам - заснавальнікам нясвіжскай рэзідэнцыі і з многімі знатнымі прадстаўнікамі нашай агульнай гісторыі ў праекце «Радзівілы: лёсы краіны і роду», які ўпершыню дэманструе творы мастацтва з калекцыі самога Мацея Мікалая Радзівіла.

Шэдэўры прыехалі на экспазіцыю ў Нацыянальны мастацкі музей Беларусі. Усе экспанаты з асабістага збору князя, нашчадка знакамітых Радзівілаў, якія ўвайшлі ў гісторыю як найбагацейшы род Вялікага Княства Літоўскага. Партрэты-мініяцюры, каля двух дзясяткаў медалёў, каляровыя гравюры, літаграфіі, радаслоўнае дрэва Радзівілаў, унікальныя слуцкія паясы і шляхецкая шоўкавая тканіна, якая выкарыстоўвалася для афармлення магнацкіх рэзідэнцый.

27 лютага беларускую сталіцу наведае сам уладальнік калекцыі - князь Мацей Радзівіл.

Манументальнае мастацтва – справа нежаночая, аднак менавіта работы мастака-кераміста Тамары Кіршчыной упрыгожваюць фасады і інтэр'еры такіх будынкаў, як мінскія гасцініцы "Кастрычніцкая", «Беларусь», Вялікі тэатр, Нацыянальная бібліятэка Беларусі і многія іншыя. Яна нават прымала ўдзел у працы над манументальным габеленам "Чарнобыль" для залы ААН у Нью-Ёрку разам з сябрам і настаўнікам - народным мастаком Беларусі Аляксандрам Кішчанкам. Адсюль сумесныя праекты, почырк, майстэрства, якія былі пакладзеныя ў аснову беларускай мастацкай школы.

На выставе «Паўтон», што адкрылася ў суседняй зале Палаца мастацтваў, - жывапіс беларускага мастака і педагога Уладзіміра Дзядзюлі. Партрэты родных, блізкіх і сяброў, творы на спартыўную тэматыку, а таксама з серыі “Язычніцкія богі славян”.

Віртуозны піяніст Дзяніс Мацуеў вяртаецца ў Мінск з новай праграмай у жанры сімфаджаз. У праграме творы Чайкоўскага і Гершвіна ў суправаджэнні Беларускага сімфанічнага аркестра.

Дзяніс Мацуеў не першы раз выбірае для свайго канцэрта сцэну Палаца Рэспублікі. На гэты раз джазавыя творы ён выканае ў суправаджэнні Дзяржаўнага акадэмічнага сімфанічнага аркестра Беларусі. Дырыжор – Юрый Ткачэнка. Чаканая сустэча з піяністам свету адбудзецца ў нядзелю, 19 лютага.

У Музеі прыроды і экалогіі архідэі з усіх кантынентаў нашай планеты. Нясумных выхадных!

 

Iншыя навіны

Дмитрию Смольскому - 80 Дзмітрыю Смольскаму - 80 25.07.2017 21:30 / Культура Дзмітрыю Смольскаму - 80