|
|
 |
Славянскi базар у Вiцебску 2007
 На працягу ўсіх гадоў існавання найбуйнейшага культурнага форуму - Міжнароднага фестывалю мастацтваў "Славянскі базар у Віцебску" - Нацыянальная дзяржаўная тэлерадыёкампанія Рэспублікі Беларусь нязменна выступае яго галоўным тэле- і радыёвяшчальнікам і адным з арганізатараў.
Штогод Белтэлерадыёкампанія максімальна шырока асвятляе ўсе значныя мерапрыемствы, якія праходзяць у рамках фестывалю. Падчас форуму ў эфіры Першага канала, тэлеканалаў "ЛАД" і "Беларусь-ТБ", а таксама Першага нацыянальнага канала Беларускага радыё, радыёканала "Культура", радыёстанцый "Беларусь", "Сталіца" і "Радыус-FM" гледачы і слухачы маюць магчымасць атрымліваць самую поўную інфармацыю аб падзеях, якія адбываюцца, з прамых трансляцый, спецыяльных уключэнняў, а таксама інфармацыйных выпускаў Агенцтва тэлевізійных навін Белтэлерадыёкампаніі.
Сёлета ў эфіры тэлеканалаў Белтэлерадыёкампаніі - прамыя трансляцыі адкрыцця і закрыцця "Славянскага базара ў Віцебску-2007", гала-канцэртаў майстроў мастацтваў, міжнароднага дзіцячага музычнага конкурсу песні, конкурсу маладых выканаўцаў эстраднай песні, аўтарскіх і юбілейных канцэртаў.
Праграмы Першага канала "Добрай ранiцы, Беларусь!" і "Ваша лато" падчас фестывалю традыцыйна будуць выходзіць у эфір прама з Віцебска. Пра самыя цікавыя і значныя падзеі фестывалю штодня тэлегледачам раскажа "Дзённік Міжнароднага фестывалю мастацтваў "Славянскі базар у Віцебску".
Белтэлерадыёкампанія па традыцыі правядзе відэазапіс усіх асноўных мерапрыемстваў і начных канцэртаў для далейшага выкарыстання ў эфіры Першага канала, тэлеканалаў "ЛАД", "Беларусь-ТБ" і "НТБ-Беларусь", а таксама для абмену відэа- і аўдыёматэрыяламі са сваімі замежнымі партнёрамі.
Сёлета прамыя трансляцыі фестывальных канцэртаў на Першым канале і тэлеканале "ЛАД", а таксама іншыя мерапрыемствы фестывалю будуць дэманстравацца на вялікіх святлодыёдных экранах сталіцы, размешчаных ля Палаца спорту і на Кастрычніцкай плошчы.
Убачыць фестываль змогуць гледачы краін блізкага і далёкага замежжа, на якія распаўсюджваецца вяшчанне спадарожнікавага канала "Беларусь-ТБ".
Для асвятлення фестывалю па запрашэнні Белтэлерадыёкампаніі ў Віцебск прыедуць журналісты тэлерадыёкампаній Расіі, Украіны, Малдовы, Венгрыі і Кубы.
Белтэлерадыёкампанія дае магчымасць вялікай колькасці тэлегледачоў і радыёслухачоў далучыцца да такой значнай міжнароднай падзеі, якім з'яўляецца Міжнародны фестываль "Славянскі базар у Віцебску". Для гэтага ў Віцебск адправіцца вялікая каманда першакласных спецыялістаў, найноўшае відэаабсталяванне. На XVI Міжнародным фестывалі мастацтваў "Славянскі базар у Віцебску-2007" будуць працаваць 175 супрацоўнікаў Белтэлерадыёкампаніі.
Упершыню падача відэасігналу будзе арганізавана па валаконна-аптычных лініях сувязі. Дзякуючы сігналу ў лічбавым выглядзе тэлегледачы ўбачаць трансляцыі канцэртаў фестывалю з палепшанай якасцю гуку і адлюстравання. Акрамя таго, спецыяльна для трансляцыі такіх мерапрыемстваў Белтэлерадыёкампанія набыла новую даўгафокусную і шырокавугольную оптыку.
Для забеспячэння трансляцый канцэртаў фестывалю будуць задзейнічаны дзве перасовачныя тэлевізійныя станцыі (ПТС "SONY" і ПТС-04), а таксама два тэлевізійныя краны і чатыры мантажныя станцыі. На пляцоўцы будуць працаваць 10 тэлевізійных камер.
Па дамоўленасці з расійскай здымачнай групай падчас трансляцый адкрыцця і закрыцця фестывалю будуць выкарыстаны камеры POLYCAM (так званыя "камеры на вудзе"), якія дазваляюць здымаць у ракурсе, які быў бы немагчымы пры выкарыстанні стандартнага набору тэлевізійнай тэхнікі.
Белтэлерадыёкампанія запрашае ўсіх тэлегледачоў і радыёслухачоў сачыць за падзеямі XVI Міжнароднага фестывалю мастацтваў "Славянскі базар у Віцебску" на Першым канале і тэлеканалах "ЛАД" і "Беларусь-ТБ", а таксама на хвалях Першага нацыянальнага канала Беларускага радыё, радыёканала "Культура", радыёстанцый "Беларусь", "Сталіца" і "Радыус-FM". |
Афицыйны сайт фестывалю "Славянскі базар у Віцебску" www.festival.vitebsk.by
|
|
|
|
|
Архіў
уверх
